Bir chimdim maslahat
Xonadonining suyukli ayollari, tinib-tinchimas bekalar! E’tiboringizga havola etayotgan siz bilgan va bilmagan yoinki nazaringizdan chetda qolgan quyidagi jihatlar sizga ro’zg’orda qo’l keladi, degan umiddamiz. Marhamat!!! ☺ Yog‘larni saqlash va ulardan foydalanish xususida: Tozalanmagan ba’zi yog’larda cho’kindi bo’lganligi sababli ham ko’tarib olib ishlatish zarur; Yog’ni qayta ishlatadigan bo’lsangiz, suzib oling. Chunki unda ilgari qovurilgan mahsulotlarning qoldiqlari bo’lishi mumkin; Yog’larni mis idishda saqlamang, sifati buziladi; Yog’larni, ayniqsa,sariyog’ va maskayog’ni qorong’i yerda saqlash kerak. Agar yog’ga quyosh nuri ta’sir etsa, unda inson organizmi uchun zararli bo’lgan yog’ kislotasi hosil bo’ladi. Xamir xususida: Xamir qilinadigan un garchi toza bo’lsa ham elab ishlating. Elanganda unning orasiga havo kirib, xamir yaxshi ko’pchiydi; Qaynoq suvga xamir qorib bo’lmaydi. Chunki qaynoq suv xamirni tirishtirib yoyishni qiyinlashtiradi, shuningdek, g’ozini yo’qotadi. Natijada, xamir yaxshi ko’pchimaydi ham; Xamirni o’z hajmidan 2 barovar katta tog’orada qoring; Xamir qorayotganda suvni birdan qo’shmang, oz-ozdan qo’shsangiz xamir tez qoriladi va yaxshi chiqadi; Xamir maxsulotlarining orqasi tandirda yopishib, tushib qolmasligi uchun yopishdan oldin qizigan tandirning devorlariga namakob seping. Pichoqlarni saqlash xususida: Pichoqlarni vilka qoshiqlar bilan birga saqlamang, aks holda tez o’tmaslashib qoladi; Piyoz va baliq kesilgan pichoqning hidini ketkazish uchun issiq suvda yuvib, quruq tuz bilan yaxshilab ishqalang. Idishlarni toza saqlash xususida: Toza yuvilmagan idish nafaqat taomning sifatini buzadi, balki sog’liqqa ham zarar yetkazishi mumkin; Ovqat suzishdan oldin idishlarni qaynoq suvda bir bor yuvib oling. Chunki odatda, idishlarni maxsus kukunlaridan foydalangan holda yuvamiz. Idish-tovoqlardan tozalash kukunlarining hidi kelib qolishi yoki toza yuvilgan idishlarga ham chang qo’ngan bo’lishi mumkin; Idish yuvganda suvga bir oz tuz yoki non soda solinsa, idishning kiri tez ketadi. Ovqat nega kuyadi? Olovning balanligidan; Qozonda yaxshi tozalanmagan bo’lsa, ya’ni eski ovqatning qoldiqlari qolgan bo’lsa; Ba’zan idishning yupqaligidan; Kuyish masaliqning hususiyatiga ham bog’liq. Va boshqa maslahatlar: Go’shtli va yog’li taomlardan so’ng sovuq suv ichmang. Shifokorlarning fikriga ko’ra, bu gastrit va ichak yarasi kabi kasalliklarni chaqiradi; Jigar va jigardan pishiriladigan taomlarga tuzni juda kam miqdorda solgan ma’qul. Aks holda jigar qattiq bo’lib qolishi mumkin; Oshdan tosh chiqishiga ba’zan tuz sababchi bo’lishi, tuz bilan birga mayda toshlar tushishi mumkin. Shuning uchun taom pishirayotganda tuzini eritib, ya’ni namakob qilib ovqatga quygan ma’qul. | |
| |
Просмотров: 1938 | | |
Всего комментариев: 0 | |